وزیراعظم عمران خان آج اقوام متحدہ کی جنرل اسمبلی سے خطاب کرینگے

اسلام آباد: وزیراعظم عمران خان آج اقوام متحدہ کی جنرل اسمبلی کے چھہترویں اجلاس سے ویڈیو لنک کے ذریعے خطاب کرینگے .

وزیراعظم اپنے خطاب میں مقبوضہ کشمیر میں بھارتی مظالم اور افغانستان کی صورت حال سمیت دیگر امور پر دنیا کو پاکستان کے مؤقف سے آگاہ کریں گے۔

یاد رہے کہ اقوام متحدہ میں پاکستان کے سفیر منیر اکرم نے چند روز قبل بتایا تھا کہ وزیراعظم عمران خان 24 ستمبر کو جنرل اسمبلی کے اجلاس سے خطاب کریں گے جس میں وہ کشمیر اور افغانستان سمیت دیگر مسائل پر اظہار خیال کریں گے۔

وزیراعظم کا پالیسی بیان پاکستان کی سفارتی رسائی اورعالمی شراکت داری اور اہم اداروں کے ساتھ تعلقات میں اضافہ میں کردار ادا کرے گا۔ پاکستان نے اقوام متحدہ میں ہمیشہ ایک موثر اور تعمیری کردار ادا کیا ہے۔

متعددعلاقائی اور عالمی مسائل سمیت حالات حاضرہ کے چیلنجوں سے نمٹنے میں عالمی ادارے کی طرف سے ذمہ داریاں سرانجام دینے میں اس سے تعاون کیا ہے۔

وزیراعظم کا یہ خطاب عالمی امن، سلامتی، پائیدار ترقی کے فروغ اور دنیا بھر میں انسانی حقوق کے احترام میں اقوام متحدہ کے مرکزی کردار کے حوالے سے پاکستان کے وعدوں کا عکاس ہوگا۔